ബെംഗളൂരു: ഏപ്രിൽ 29 ബുധനാഴ്ച നഗരത്തിലുണ്ടായ കനത്ത മഴയിൽ ചർച്ച് സ്ട്രീറ്റിലെ പ്രശസ്തമായ ‘ദി ബുക്ക്വോം’ പുസ്തകശാലയ്ക്ക് വൻ നാശനഷ്ടം സംഭവിച്ചു. ഏകദേശം 4,000 മുതൽ 5,000 വരെ പുസ്തകങ്ങൾ മഴവെള്ളം കയറി നശിച്ചതായും ഇതിന് 14 ലക്ഷം രൂപയോളം മൂല്യം വരുമെന്നും പുസ്തകശാല അധികൃതർ അറിയിച്ചു. വെള്ളത്തിൽ പൊങ്ങിക്കിടക്കുന്ന പുസ്തകങ്ങളുടെ ദൃശ്യങ്ങൾ പുസ്തകശാല തന്നെ ഇൻസ്റ്റാഗ്രാമിലൂടെ പങ്കുവെച്ചിട്ടുണ്ട്.
‘ബാംഗ്ലൂരിലെ പുസ്തക മനുഷ്യൻ’ എന്നറിയപ്പെടുന്ന ഈ സ്ഥാപനം കഴിഞ്ഞ 28 വർഷമായി പ്രവർത്തിച്ചു വരികയാണ്. വേനൽക്കാല അവധിക്കാലത്തെ ബിസിനസ് ലക്ഷ്യമിട്ട് എത്തിച്ച പുതിയ പുസ്തകശേഖരമാണ് പ്രധാനമായും നശിച്ചതെന്ന് ഉടമ കൃഷ്ണ വ്യക്തമാക്കി.
ആസ്റ്ററിക്സ്, ഒബെലിക്സ് പോലുള്ള കോമിക്സുകൾ ഉൾപ്പെടെയുള്ളവയ്ക്ക് കേടുപാടുകൾ സംഭവിച്ചിട്ടുണ്ട്. നിലവിൽ നശിച്ച പുസ്തകങ്ങളിൽ ചിലത് വെയിലത്ത് ഉണക്കി കുറഞ്ഞ വിലയ്ക്ക് വിൽക്കാനാണ് ജീവനക്കാർ പദ്ധതിയിടുന്നത്. പുസ്തകങ്ങൾ നശിച്ച വാർത്തയറിഞ്ഞ് നിരവധി പുസ്തകപ്രേമികൾ സഹായവാഗ്ദാനവുമായി രംഗത്തെത്തിയിട്ടുണ്ട്.
